يوميات
رمضانية
نباتي
تأليف /
متولي بصل
كل الناس فاكريني نباتي
حتى ولادي كمان ومراتي
افتكروني عدو اللحمة
وحالف ما اشتريهاش في حياتي
ولا سماك اروح له ولا فرارجي
ولا اكلم جزار أو حاتي
وأكل البيت ع النوته يوماتي
م البقال أو م الخضراتي
وانا والله بموت في اللحمة
عمري ما بتبطر ع النعمه
د انا من غلبي ببكي ليلاتي
بس لا قادر أقول ولا اهاتي
كنت زمان اسم الله صنايعي
ولا محتاج دخل ولا وظيفة
المنشار كل كل صوابعي
وفاتني مفيش في الجيب تعريفه
واني اتسول مش من طبعي
حر يا خلق ونفسي عفيفه
وخدت معاش ما يكفي إيجار
ولا بيدوم ليله ولا نهار
وانا أهو صابر ع اللي جرى لي
بس الناس يسيبوني في حالي
واللي خلقني وخلق الكون ده
قادر يرزقني انا وعيالي
ليست هناك تعليقات:
إرسال تعليق