( هل من مزيد ؟ ) كلمات : متولي بصل

( هل من مزيد ؟ )

متولي بصل

يا عيد قلبك من حجر

بل من حديد

إذ جئت كي تُلهي البشر

عن ذلك الظلم الشديد

هل سيّسوك

وبماذا يا عيد اشتروك

فقد اشتروا

حتى ملوك النفط

صاروا كالعبيد

أتقيم حفلا في الرياض

وصغار غزة

لم يذوقوا البُرِّ من زمن بعيد

وتُقيم عُرسا في الرباط

ونساء غزة كل يوم

تبكي على طفل شهيد

أطفال غزة يُقتلون

ويُحرقون أمامنا

وتريد منا

أن نقول لمن بغى

هل من مزيد

يا عيد ما تلك الليالي الساهرة

والساخرة

علّقت في بغداد زينات الفرح

وفي ربوع القاهرة

زينت بالأضواء

ساحات المساجد والكنائس

وملأت قاعات الملاهي بالحشود

إن كنت حقا جئت كي

تمحو هموم قلوبنا

أوقف قطار الموت

سلسل صهاينة اليهود

وارحم صغارا

ما لهم ذنب سوى

أن الدم العربي

يجري في خلاياهم

وينبض في الوريد

يفدون أبناء العروبة

بينما أهل العروبة كلهم

قد وقّعوا طوعا على صكّ جديد

يقضي بأن

تُمحى فلسطين الحبيبة

وكل ماضيها التليد

ولذا فلا تعجب إذا

ما قال بايدن أو نتنياهو

لا ..

ليس لأهل غزة من وجود

وليس لهم حقوق

فليموتوا اليوم جوعا

أو من البرد الشديد

أو يموتوا بين أنياب الضواري

أو إذا شئتم

سنرسلهم إليكم

في طرود بالبريد

 

يوميات رمضانية ( حسنه يا بيه ) تأليف: متولي بصل

 

يوميات رمضانية

تأليف: متولي بصل

 

( حسنه يا بيه )

شحاته قمر بعيون غزلان

بعبايه وطرحه بتدلل

وبصوت كروان طلبت إحسان

والناس في جمالها بتتغزِّل

طلعت في البنك أهم زبون

واسمها في كشوفهم متسجِّل

ورصيدها عدى الكام مليون

يعني مستثمر ومموِّل

واعرف شحات من بعد ما مات

مع إنه كان كدا متبهدِل

دافن في سريره رزم دولارات

وسبايك دهب اصفر يخبل

 

***************

 

ليه الشحات والمتسول

عمره لا بيتوب ولا يتحوِّل

حتى اما ظروفه بتتغدل

والحال يبقى احسن م الأوِّل

ما في شارع أو ناصية حاره

إلا وفيه واحد متسوِّل

قاعد بموبايل وسيجاره

أو عامل شحات متجوِّل

وساعات تلقاه واحد باشا

وتحس انك قدامه عيِّل

أو شيخ مسنود على عكازه

أو طفل على سرير متنقِّل

وف شهر الصوم تصحى من النوم

على صوت بينادي وبيهلل

واذا ما دفعتش للبيه المعلوم

يفضل في الشارع ويطوِّل

***************

وتلاقي فقير غلبان مسكين

صابر على حاله ومتحمِّل

حتى لو فقره يطول لسنين

لا يمد إيديه ولا يتسوِّل

واللي ف بيتها كام طفل يتيم

بحيائها يا عيني بتتجمِّل

عارفه بإنها لها رب كريم

بولادها ورزقها متكفِّل

 ليه الشحات والمتسول

عمره لا بيتوب ولا يتحوِّل

حتى اما ظروفه بتتغدل

والحال يبقى احسن م الأوِّل

 

يوميات رمضانية (لسه إيه ما بعناهوش ) تأليف : متولي بصل

  

يوميات رمضانية

تأليف : متولي بصل

(لسه إيه ما بعناهوش )

مستحيل يكون دا حالنا

إحنا إيه اللي جرى لنا

بعنا أخلاقنا ودينا

لسه إيه ما بعناهوش

اللي بيفرَّط في لحمه

الزمن لو حتى رحمه

وبات في إيده كنوز قارون

كلها ما تعوَّضوش

واللي بيبيع حته منّه

حتى لو كان غصب عنّه

اللي باعه ف عمره كله

عمره دا ما يرجَّعوش

الشرف دارنا وعيالنا

والكرامه رأس مالنا

واللي يتهاون في شرفه

أو كرامته ما نعرفوش

واللي يتعمِّد يهينّا

أو يِقِل يا خلق منّا

مستحيل دا يبقى منَّا

وبكره راح يطلع فاشوش

يوميات رمضانية ( قبل ما اسرق ) تأليف : متولي بصل

 

يوميات رمضانية

تأليف : متولي بصل

( قبل ما اسرق )

أكلوني يا ناس دشيش

لبسوني ان شا الله خيش

موتوني ألف موته

المهم ابني يعيش

قبل ما اسرق قبل ما اظلم

قبل ما اتحوِّل لمجرم

شغلوني أي شغله

حتى لو في فرن عيش

شغلوني امسح سلالم

عند بيه أو عند هانم

مش مهم انا عندي خالص

المهم الواد يعيش

العلاج يا خلق غالي

محتاجين مبلغ خيالي

ذنبه إيه ابني ضنايا

لما يعيا ما يلاقيش

كان زمان الكشف عاده

والعلاج كان في العياده

كله موجود وبزياده

وكان مفيش كلمة مفيش

النهارده لا عاد لا بركه

ولا عاد فيه خير ولا عاد فيه حركه

وتحس إنك مربوط في فَلَكَه

أو فرخه من غير أي ريش

الفلوس بالمليارات

وناس بتملك طيارات

والفقير لو حتى مات

عندهم بقى ما يساويش

 

يوميات رمضانية ( إبليس لما يصوم ) تأليف متولي بصل

 يوميات رمضانية

تأليف متولي بصل

( إبليس لما يصوم )

اللي الناس تعبت من نصبه

واللي الناس كرهته من كدبه

واللي بيظلم ويخون صاحبه

واللي بيسرق من جار جنبه

واللي لسانه زي المبرد

بيجيب سيرة حتى قرايبه

واللي بيكره واللي بيحقد

واللي بيحسد حتى حبايبه

هو مفكَّر إن الصوم

بس يصوم عن أكله وشربه

الصوم جُنه يعني الصايم

يرجع بقى ويتوب عن ذنبه

قبل جوارحه بيصوم قلبه

ولا يعصي ولا يغضب ربه

أمَّا اللي بيشرب وبيسكر

وليلاتي متعوِّد يسهر

وكأنه شيطان مش إنسان

أو إبليس لكن متنكَّر

يجي رمضان ويقول أنا صايم

نترجاه إحنا عشان يفطر

ما هو لو عدَّى عليه كام ساعه

من غير ما يدخَّن ويعفَّر

هيقوم زي التور الهايج

يتخانق من غير ما يفكر

ويسب ويلعن في الناس

ويدش إزازهم ويكسَّر

لأ وساعة ما المغرب تدَّن

والشيخ في الجامع بيكبَّر

تلاقيه واقف وسط الشارع

بيلف سيجارته وبيعمَّر

 

 

المشي رياضه تأليف : متولي بصل

 

يوميات رمضانيه

المشي رياضه

تأليف : متولي بصل

السواق والناس راكبين

رفع الأجره جنيه واتنين

قلنا له كلنا لأ دا حرام

قال لنا دي زيادة البنزين

معقول دا احنا ف شهر كريم

معقول دا احنا يا ناس صايمين

البنزين زاد ربع جنيه

ليه بتزود بقى جنيهين

رحت اكشف عند الدكتور

نزلة برد بقالها يومين

فسكرتيرته قامت وقالت لي

كشفنا بقى ميه وخمسين

قلت لها دا كان بس بميه

قالت بكره هيبقى مِتين

قلت لها يا هانم دا حرام

قالت دي زيادة البنزين

خارج متعكنن مخنوق

ومشيت كدا زي المجانين

قلت اجري بسرعه على السوق

ألحق أشتري تمر وتين

بس الغلا  كان أسرع مني

ما قدرتش اجيب غير ربعين

قلت ارجع ع البيت من تاني

ماشي ما كل الناس ماشيين

أصل المشي رياضه مفيده

وكمان بيقوي الرجلين

ولا في عليه كارته ولا ضريبه

وكمان مش محتاج بنزين

 

يوميات رمضانية الناس البِجِحَه للشاعر :متولي بصل

يوميات رمضانية

تأليف : متولي بصل

***********

الناس البِجِحَه

************

استقبلت هلال رمضان

وانا فرحان طاير م الفرحه

ما هو رمضان شهر الإحسان

خير ومحبه ورضا ومسامحه

الشياطين متسلسله فيه

بعد ما كانت جايه ورايحه

والغشاش هيتوب وهيرجع

واللي ضميره نايم راح يصحى

واللي قاعد على عتبة جاره

بالنظره وبالكلمه الجارحه

لما يصوم ويصلي أكيد

راح يعمل مع جاره مصالحه

جه رمضان والناس على حالها

واللي يغيظ فيه عالم بِجِحَه

ليل ونهار ينفخوا في مشاكل

بعد ما كانت الناس متصالحه

هو يجوز للصايم يشتم

والا يجوز له نقار ومقاوحه

وازاي صايم يطلع يسرق

ويسيب إيده يا عالم  سارحه

والا اللي مقضيها رشاوي

وقاعد يقرا وماسك السبحه

إزاي واحد يبقى إمام

وهو يا ناس مش حافظ الفاتحه

وازاي واحد يبقى وكيل

وفيه في ملفه جنايه وجنحه

نفسي يا بلدي أشوفك صابحه

وشك بينور م الفرحه

ومفيش أي سواد على توبك

وجبينك أبيض م الطرحه

**********