حكاية بنت اسمها سمرا
تأليف / متولي بصل
بجد
بجد بجد
بجد تعبت من التهميش
بجد تعبت ونفسي أعيش
معقول إني مواطنة في بلدي
كل طموحها
وقضيتها
وفتى أحلامها
رغيف العيش
حتى الواد اللي انا حبيته
ورضيت اعيش ويَّا امه في بيته
وقلت ده راجلي
وضِلِّي وسندي
وآخرة صبري
وقلت يفوت الدنيا بحالها
وما يفوتنيش
خيِّب ظنِّي وكسَر خاطري
وفاتني وفات لي ولاده الخمسه
وأمه الراقدة ما بتمشيش
بعد ما هج وراح على ليبيا
وليبيا في حرب
واللي يروحها يا عيني يا قلبي
يروح ما يجيش
أقضي نهاري في أشغال شاقة
علشان أقدر على مصاريفهم
والليل كله أسهره وحدي
على خدمتهم
زي ما اكون عسكري في الجيش
نفسي ارتاح م الهم شويَّه
نفسي أبص لروحي واعيش
نفسي في يوم
أصحى من النوم
ألقاه راجع
ومعاه حب يعوض صبري
وان كان كل كنوز الدنيا
لو جابهالي
ما تعوضنيش
أصلي تعبت وشفت كتير
فيه ناس من غير أي ضمير
دنيا غروره بتلعب بيا
مهما عملت ما هيَّاش ليَّا
حتى في صغري أبويا هجرنا
وامي فاتتنا ونينتي رمتنا
رحت مشيت على فين مش عارفة
كنت بجد حزينة وخايفة
تهت وضعت وتاهوا اخواتي
وقاسيت شفت كتير في حياتي
أمي وابويا استخسروا فيَّا
حتى الرحمه والحنيَّه
ولقيت نفسي بقيت وحديَّا
ولا فيه مخلوق يسأل فيَّا
كنت في تالته ولا في رابعه
بنت يا ناس محتاجه متابعه
أو حِنِّيَّه أو مراعيَّه
محتاجه حد يفكر فيَّا
محتاجه أهل يخافوا عليَّا
حتى الملجأ فيه خفافيش
ليه يا زماني ما ترحمنيش
عشت لوحدي ف أيام صعبه
من غير أحباب ولا أصحاب
كنت هموت وحياة الكعبه
ذل وقهر مرار وعذاب
ويقولوا صايعه ويقولوا ضايعه
هو يا ناس فيه شيء بإيديَّا
لو قضيت أيامي عباده
صاحيه ونايمه على السجاده
هيقولوا برده ويحكوا عليَّا
ياالله يقولوا كمان بزياده
ربنا هيجيب منهم حقِّي
اللي فاتوه أهله ورموه
عمر الخلق ما هيحبُّوه
عمري يا رب ما قلت اشمعنى
قصة عمري ما لهاش معنى
و لا فكَّرت اني اشكي أو ادعي
علِّي ظالمنا ومضيَّعنا
قادر إنك تعدل حالي
وتعوضني عن اللي جرالي
نفسي يا رب تريَّح بالي
وتفرحني بفرْح عِيالي
ليست هناك تعليقات:
إرسال تعليق