حال الجنيه
بقلم
متولي بصل
ــــــــــــــــــــــــ
نِزِل الجنيه السوق قال إيه
راح يشتري حِزمة جرجير
عم اِسمه إيه قام رد عليه
وقال يا ريت ينفع يا أمير
جه الدولار قام خد معاليه
خمسه وعشرين حِزمه يا بيه !
رِجع الجنيه والحزن ماليه
م الهم بيجرجر رجليه
وسرح بفكره ف عِز ماضيه
أيام ما كان له تشريفه
زمن الريال والربع جنيه
والقرش صاغ والتعريفه
أيامها كان يشتري فدَّان
وكان بخمسه دهب رنَّان
من يوم ما عام وصَبَح غرقان
بقى حاله ما يسرش إنسان
حتى العيال سمُّوه الهلفوت !
لا بيشتري لبان ولا بسكوت
والواد يشوفه يطق يموت
لو ميت جنيه مش هتكفِّيه !
كان بس إيه لزوم تعويمه
ما كان نافعنا على قديمه
البحر غدَّار ولا فيه هزار
غِرِق الحزين فيه بهدومه !
ليست هناك تعليقات:
إرسال تعليق