قاعدين نصلِّي اِحنا التراويح
والقهوه جارنا ف وش الريح
ريحة المعسِّل والتمباج
خلِّت دماغي زي المراجيح
وغلطت في قراية القرآن
من دوشة القهوه يا جدعان
وصدري زيَّق م الدخان
والكحه عملت فيه هيجان
أروح اَشوف جامع تاني
يا ناس بعيد عن أي جيران
***
صلِّيت في جامع تاني بعيد
حسيت كأني في ليلة العيد
ريحة الكولونيا والبارفان
والمسك على كل السجاجيد
حتى الإمام زي الكروان
وقرايته كلها بالتجويد
ولما خلَّصت التراويح
وقمت اَدوَّر ع الجزمه
فتشت عنها ف كل مكان
ما لقيتها ولقيتني في أزمه
اِللي سرقها أكيد دا شيطان
قلبه ما فيه ذرِّة رحمه
خرجت أدَّارىَ في الزحمه
زي اللي ماشي على نار فحمَه
أروح أشوف جامع تاني
لو حتى في بلاد الواق واق
***
صليت في جامع تاني بعيد
الخلق فيه مِيَّه المِيَّه
فيه السلام لازم بالإيد
ومقابله إيه .. غير طبيعيه
وفيه مسابقه ثقافيه
جوايزها نقد وعينيَّه
وعصير وتمر وقمرالدين
وكنافه باللوز محشيَّه
بس الخطيب بيعيد ويزيد
ويقول عن الناس ضلاليه
ويجيب في سيرة الداخليه
ويجيب في سيرة الخارجيه
بالذمّه مش حاجه عجيبه
مش برضه يبقى اسمها غيبه
جايين نصلي يا عم الشيخ
واَلاَّ نبات في التخشيبه
دي أكيد يا ناس حاجه مريبه
حاسس كأني في مصيبه
طب البوليس بعد شويَّه
حط الكلابشات في إيديه
ولقيتني محبوس في قضيَّه
مع الجماعه الفلانيَّه
أروح أصلِّي يا عالم فين
أصلِّي بقى في التخشيبه
***
بس عشان عمري في حالي
وبعيد عن السكه الضايعه
وصِعِب على الظابط حالي
خرَّجني في الليله السابعه
ريَّحت في الليله التامنه
وبقينا في الليله التاسعه
أروح أصلِّي بقى التراويح
لو حتى بقى على نور شمعه
ليست هناك تعليقات:
إرسال تعليق