الجميل صُدفة...
دايماً فِ ناس بتقول ..... إن الجميل صُدفَه
صعب تِلاقيه علي طول ..... و عاوِزلُه ١٠٠ لَفَّه
ما تجيب معاك كشكول .... نُكتُب سوا الوصفه
دا جمالة مُش معقول ..... رِقَّة و كمان خِفَّه
الحُسن لِيه مَدلول .... عَسَل أوي مُصَفَّى
و المَشيَه ليها أُصول .... و تِلاقِي لِيه زَفَّه
و الوِش كُلُّه قُبول .... أصلي بِدون كُلْفَه
حتي فِ ضِحكُو خَجول .... و أجمل ما فيه عِفَّه
بيقول كلام معسول .... و البَسمه عَ الشِفَّه
و العود كمان مَجدول .... مانيكان يا ناس واقفه
زَيّ مَالكتاب بيقول .... دا اللي خَلَق وَفَّى
لا تقولِّي دول و لا دول .... تفاح...!! و دِي أَوِّل القَطفَه
بيشوفها المعلول ..... فجأه تِلاقيه يِشفَى
بيِّعَقَّل المَخبول .... تلاقيه وراه يِحفَى
و عيونه عاوزه تقول .... عَجباك ؟ أيوا مَنا عارفه
لو شُفتو مُش مسئول .... قلبك يِجيه رَجفَه
هسأل سؤال و هقول .... ليه بِنلاقِيه صُدفَه؟
يِمكِن عشان مشغول .... و لَّا عشان ناشفَه
مَضحوك عَلينا يا زول .... و لَّا الرجال خايفه
لو حَد عَندُه حلول ..... يِحكيلنا إيه الصِرفَه
سعيد عبدالله - المنصورة
ليست هناك تعليقات:
إرسال تعليق